सहकारीहरुको मल कमाइ खाने भाँडो भएको किसानको आरोप
कपिलवस्तु समाचारदाता
कपिलवस्तु, साउन २९ गते । सहुलियतको मल बिक्री गर्ने जिम्मा पाएका कृषि सहकारी संस्थाले अधिकारको दुरुपयोग गरेको पाइएको छ । कपिलवस्तुमा अनुदानको मल सहकारीमार्फत महँगोमा कृषकहरूलाई बिक्री गरिएको छ । कृषकहरूलाई सहज र सुलभ बिक्री गर्ने जिम्मा पाएका जिल्लाका अधिकांश सहकारी संस्थाहरूलाई यतिखेर सहुलियतको मल कमाइ खाने भाडो बनेको हो ।
जिल्ला कृषि समितिको निर्णय अनुसार तीन वर्षदेखि सहुलियतको मल सहकारी संस्थामार्फत मात्र बिक्री गर्ने जिम्मेवारी दिइएको छ । सहकारीलाई सहयोग भन्दै उनीहरूले सामग्री कम्पनीले दिएको मूल्यभन्दा दोब्बरसम्ममा मल बिक्री गर्ने गरेको पाइएको छ ।
जिल्लास्थित तौलिहवा र बहादुरगन्जमा रहेको कृषि सामग्री कम्पनी लिमिटेड प्रशाखामा आएको अनुदानको मल तीन वर्षदेखि सहकारी संस्थालाई दिने गरिएकोे छ । ती प्रशाखा कार्यालयले तौलिहवामा रहेका दुई सय र बहादुरगन्जमा ६५ सहकारी संस्थालाई मल बिक्री गर्ने गरेका छन् । ७७ गाविस र १ नगरपालिका रहेको जिल्लामा कृषि सामग्रीले एक गाविसमा ४० क्विन्टलका दरले सहकारी संस्थाहरूलाई मल दिने गरेको जनाएको छ । कृषि सामग्रीले ५० प्रतिशत सहुलियतमा युरिया र डीएपी मल कृषि सामग्रीलाई बिक्रीका लागि दिने गरेको जनाएको छ तर सहकारी संस्थाका केही पदाधिकारीहरूको मातहतमा मल रहने गरेको बताइएको छ ।
उक्त मलमा सहकारी संस्थाको हालीमुहाली भएपछि यहाँ हजारौँ कृषकहरू मलबाट वञ्चित बनेका छन् । सीमित मल त्यसैमा पनि सहकारी संस्थाले समेत मल वितरणमा धाँधली गरेपछि उनीहरू निराश बनेका छन् । मल वितरणमा भएको अनियमितताबारे प्रशासन र कृषि कार्यालयमा कयौँ पटक उजुरी दिए पनि कुनै सुनुवाई नभएको कृषक रामदेव यादवले गुनासो गरे ।
बिक्रीका लागि लगिएको मल लुकाइने, बाटोमै बढी रकम लिएर बेच्ने तथा कालोबजारी गर्ने गरेको उनीहरूको भनाइ छ । अनुदानको मल सहकारी संस्थाको अध्यक्षकै नियन्त्रणमा रहने र उनीहरूले कृषकहरूलाई मल दिएका छैनन् । फोरमका जिल्ला अध्यक्ष अब्दुल रसिद खाँले भने, सहकारी संस्थाले मल वितरण नगरी सिद्धायो भन्ने गरेको र वास्तविक किसानले अझैसम्म एक दाना पनि मल पाएका छैनन् । सहकारी संस्थाले व्यापक अनियमितता गरेकाले अब सहकारीबाट नभई सामग्रीले कृषकको लालपट्टाका आधारमा मलखाद बिक्री गर्नुपर्ने उनले माग गरेका छन् । गोरखापत्र राष्ट्रिय दैनिकमा प्रकाशित
0 comments:
Post a Comment