सहकारीले बुझाउने मासिक विवरण सरल बनाइने

यादव हुमागाई काठमाडौं, ८ चैत

बचत तथा ऋण सहकारीले मासिक रूपमा बुझाउँदै आएको कारोबार विवरणलाई सहकारी विभागले सहज बनाउने भएको छ । हालसम्म प्राप्त विवरणको विश्लेषण र सहकारीकर्मीका सुझावका आधारमा विवरण बुझाउने प्रक्रियालाई सहज र सरल बनाउन लागिएको विभागका अधिकारीले जनाएका छन् ।

“विभागमा हालसम्म प्राप्त विवरणहरूको अध्ययन र सहकारीले दिएका सुझावका आधारमा प्रक्रियालाई केही सहज र सरल बनाउँदैछौं” विभागका रजिष्ट्रार सुदर्शनप्रसाद ढकालले भने, “अहिलेको प्रक्रिया र ढाँचामा केही थपघट हुनसक्छ ।”

अहिले आइरहेका विवरणमा कतिपय जानकारीहरू अपूर्ण देखिएकाले त्यसलाई पनि समेटिने गरी ढाँचालाई परिमार्जन गर्न लागिएको ढकालले बताए ।

यस्तै हाल सबै सहकारीलाई मासिकरूपमा विवरण बुझाउनुपर्ने व्यवस्था गरे पनि कारोबारका आधारमा यसलाई केही सरल बनाउन लागिएको ढकालले जानकारी दिए । “अहिले सबै संस्थालाई मासिक रूपमै कारोबार विवरण बुझाउन भनेका छौं,” ढकालले भने, “कारोबारका आधारमा मासिक, त्रैमासिक, अर्धवार्षिक र वार्षिक रूपमा विवरण बुझाउने व्यवस्था गर्न लागेका छौं ।” समुदायमा आधारित र सानो कारोबार भएका सहकारीले वार्षिक रूपमा मात्र कारोबार विवरण बुझाए हुने व्यवस्था गर्न सकिने उनको भनाइ छ ।

नेपाल राष्ट्र बैंकको हितमा मात्र मासिक विवरण लिन सुरु गरिएको सहकारीकर्मीको आरोपलाई उनले खण्डन गरे । विवरण संकलन गर्ने ढाँचा बनाउन मात्र बैंकको सहयोग लिएको बताउँदै ढकालले भने, “राष्ट्र बैंकले पाँच करोड भन्दा बढी कारोबार भएका सहकारीको मात्र रुचि लिएको छ, हाम्रो त एक÷दुई हजार निक्षेप भएका सहकारीलाई हेर्नुपर्छ ।”

विभागले गत माघदेखि बचत तथा ऋण सहकारीलाई अनिवार्य मासिक कारोबार विवरण बुझाउन निर्देशन दिएको थियो । हालसम्म करिब ७० प्रतिशत सहकारीले विवरण बुझाउँदै आएको छ । विवरणलाई कम्प्युटरमा व्यवस्थित गरिरहेको विभागले जनाएको छ ।

सहकारीहरू वित्तीय अनुशासनविपरीत चलेको र कारोबार पारदर्शी नभएपछि अर्थ मन्त्रालय र केन्द्रीय बैंकको निर्देशनमा विभागले सहकारीलाई मासिक विवरण बुझाउन निर्देशन दिएको हो ।

विभागले हाल सहकारीबाट निक्षेप र कर्जाका साथै सेयर पुँजी, विभिन्न जगेडा कोषमा जम्मा भएको रकम लिँदै आएको छ । त्यस्तै कर्जा लगानी र त्यसको असुलीको अवस्था, कर्जा जोखिम वापतको व्यवस्थालगायतका विवरण उल्लेख गर्नुपर्नेछ ।

विभागको तथ्यांकअनुसार गत चैतसम्ममा देशभर ८ हजार ८ सय ८ बचत तथा ऋण सहकारी सञ्चालनमा छन् ।

Posted in: