११ चैत्र, कञ्चनपुर ।
सर्वसुलभरूपमा सामग्री पाइन थालेपछि जिल्लाको दक्षिणी क्षेत्रमा रहेका सस्ता सहकारी पसलप्रति सर्वसाधारणको आकर्षण बढेको छ । एक वर्षदेखि सञ्चालनमा रहेको परासन बहुमुखी सहकारी संस्थाले सहकारी डिभिजन कार्यालयबाट प्राप्त रु एक लाख अनुदानबाट सहकारी सस्तो पसल सञ्चालन गरेको हो । कृषि तथा सहकारी मन्त्रालयको नीतिअनुरूप सहकारी पसल सञ्चालन गर्न अनुदानको व्यवस्था गरेको थियो । सहकारी डिभिजन कार्यालयका अनुसार यहाँ २२ वटा सहकारी पसललाई गतवर्ष प्रत्येक पसललाई रु एक लाखका दरले अनुदान रकम उपलब्ध गराइएको थियो ।
उक्त सहकारी पसलबाट बजारको तुलनामा सस्तोमै खाद्य सामग्री, रासायनिक मललगायतका समग्री उपलब्ध हुन थालेपछि लाइनमा बसेर पनि सर्वसाधारणले सामग्री खरिद गर्न आउने गरेको पसल सञ्चालक बुद्धिराम कटुवालले बताउनुभयो । पसलमा हाल रु चार लाखभन्दा बढीको लगानी गरिएको सहकारीका पदाधिकारीले बताए । एक वर्षअघि पसल सञ्चालन नहुँदा यहाँका सर्वसाधारणले टाढाको भारतीय बजारमा सामान खरिद गर्न जानुपर्ने बाध्यता थियो । सम्पूर्ण सामग्री एउटै ठाउँमा पाइन थालेपछि स्थानीयबासीलाई सहज भएको स्थानीय धनबहादुर विकले बताउनुभयो । सहकारीमा हाल ३२ जना सेयर सदस्य रहेका छन् । पसलबाटै सहकारीले मासिक रु ३० हजार आम्दानी हुने गरेको पसल सञ्चालक कटुवालले बताउनुभयो । अनलाइन खबर बाट साभार
0 comments:
Post a Comment